Mesfushori Lavdim Grainca do të jetë pjesë e FC Ferizaj në sezonin e ardhshëm. Mesfushori që shkëlqeu me Ulpianën sezonin e kaluar, po rikthehet aty ku e ka filluar karrierën, duke kaluar të gjitha grupmoshat e FC Ferizaj. Jemi të lumtur që një lojtar me shumë perspektiv do të përforcojë mesfushën tonë. Shumë suksese në fanellën kaltër e bardh, Lavdim Grainca #FCF#LavdimGrainca#NewTransfer
Këtë vit, FC Ferizaj do të garojë për herë të parë me gjeneratën U21 në ” Bon Voyage Superliga” Skuadra jonë ka emëruar trajner Liridon Leci si kryetrajner të skuadrës tonë, i cili së fundi ishte trajner te skuadra Flamurtarit në Ligën e parë. Na priftë e mbara
Ju njoftojmë se me marrëveshje të dy anshme klubi ynë dhe mesfushori Gavazaj kanë përfunduar kontratën. Alush Gavazaj ishte bashkuar me ne në afatin kalimtar të janarit, si një përforcim shtesë në rrugëtimin tonë drejt Superligës. FC Ferizaj falenderon Gavazajn për kontributin, duke i dëshiruar shumë suksese në rrugëtimin sportiv.
FC Ferizaj ka kënaqësi të ju njoftoj se Arsim Abazi do të jetë trajner i skuadrës edhe për edicionin 2024/25. Trajneri Abazi që me shumë sukses arriti që të na inkuadroj në Superligë, ku për 18 ndeshje, shënuam 16 fitore, është shprehur optimist se suksesin do ta bartë edhe në Superligë. FC Ferizaj, trajnerit Abazi dhe stafit të tij, do t’i ofrojë lojtarët më të mirë në treg, për një skuadër me mentalitet fitues dhe suksese në Superligë. Na priftë e mbara
FC Ferizaj ka kënaqësi të ju informoj se sot ka arritur marrëveshje me mesfushorin e njohur, Gentrit Limani. Limani në të kaluarën ka qenë pjesë e Përfaqësueses së Kosovës U-21, ndërsa më parë ka veshur fanellën e Kosovës edhe për grupmoshën U-19. Karrierën e tij e ka nisur tek kategoritë e reja në Gjermani, tek Eintracht Frankfurt, për të vazhduar më pas në Kickers Offenbach U17, VfL Bochum U19, Hamburger SV II, FC Rot-Weiß Koblenz e së fundi pjesë e KF Llapi.
11 maj, 2024 – FC Ferizaj është kurorëzuar me titullin e kampionit në Raiffeisen Ligën e Parë – Grupi B. Në ceremoninë e ndarjes së trofeut dhe medaljeve për FC Ferizaj, të organizuar nga Federata e Futbollit e Kosovës pas ndeshjes së javës së parafundit të këtij edicioni ndërmjet Ferizajt dhe Vushtrrisë, e cila u mbyll me fitoren e mysafirëve 3:2, presidenti Agim Ademi ndau trofeun për kapitenin Edon Sadriu, derisa medaljet për futbollistët dhe stafin i ndanë Ismajl Ajeti, anëtar i KE-së, Xhemile Murati Shabani, drejtoreshë për sport në komunën e Ferizajt, Afrim Haliti, kryetar i LRF të Ferizajt dhe Faton Sojeva veteran i klubit ferizajas.
Kjo fundjavë kaloi me festë dhe momente gëzimi e krenarie në qytetin tonë. Padyshim se në kujtesën tonë do të mbeten dy lojtarë që u përshëndetën nga futbolli aktiv. Ergon Hyseni, kundër KF Vushtrrisë e zhvilloi ndeshjen e tij të fundit. Në këtë mënyrë duke i dhënë fund një karriere të pasur dhe me shumë suksese. Edhe mbrojtësi tjetër, Behar Bardhi këtë fundjavë u përshëndet nga futbolli aktiv, mes duartrokitjeve frenetike të tifozërisë tonë.
Drejtori menaxhues i klubit tonë, Betim Isufi është certifikatuar në programin UEFA Certificate Football Management (CFM) nga UEFA Academy.Pas një angazhimi më shumë se 9 mujor, ku ishin 30 pjesëmarrës nga 9 shtete të ndryshme, këtë javë u mbajtë ceremonia e shpërndarjes së certifikatave.Ky program shumë i rëndësishëm i UEFA-s, ka një rëndësi të jashtëzakonshme për të gjithë ata që janë të përfshirë në klubet dhe organizatat e futbollit që dëshirojnë të avancojnë nivelin e tyre në menaxhim
Dy kupa të Kosovës në Hendboll, brenda pak orëve zbarkuan në qytetin tonë. Klubi historik i Hendbollit “Kastrioti”, riktheu kupën e Kosovës në Ferizaj ditën e sotme, duke u shpallur Kampion i Kupës së Kosovës në hendboll. Kurse pak orë më herët, Klubi i Hendbollit Femrat “Ferizaj”, u shpallën Kampione të Kupës së Kosovës në hendboll. Si president i FC Ferizaj, në emër të gjithë stafit tonë, urimet e përzemërta të gjithë sportistëve e sportdashësve për këtë sukses historik, dy kupa të Kosovës brenda ditës. Qyteti i Ferizajt historikisht ka qenë vatër e hendbollit. Sukseset e arritura ditën e sotme në hendboll janë vetëm nismëtare e kupave që do të vijnë në qytetin tonë këto javë. Shihemi në gëzimet e tjera, në sportet tjera. Me respekt, Presidenti i FC Ferizaj Lulzim Abazi
S U P E R L I G A – MISSION COMPLETED Zyrtarisht Kampion të Kosovës në Ligën e Parë në futboll Tifozë të klubit, ne ju premtuam që do të rikthehemi menjëherë aty ku e kemi vendin, në Superligën e Kosovës. Misioni ynë u përmbyll me sukses. Urime lojtarëve për angazhimin, stafit për punën e palodhshme e mbi të gjitha sportdashës e tifozëri UJQI që na përkrahët. Pritna Superligë, kësaj here si aktorë, e jo vetëm spektatorë. Urime Ferizajli
© 2024 Te gjitha te drejtat e rezervuara nga FLASH AGENCY
